კორბოულის N 2 საჯარო სკოლა, იმერეთში, საჩხერის რაიონის მაღალმთიან სოფელში მდებარეობს. 1927 წელს გოგოლაძეების უბანში გაიხსნა დაწყებითი სკოლა 27 მოსწავლეზე და განთავსებული იყო ვაჭრის სანდრო კილაძის დუქანში, პირველი მასწავლებლები იყვნენ ვლადიმერ ცერცვაძე, ვანიჩკა მაჭარაშვილი, თამარ მაჭარაშვილი და ისაკ ტაბატაძე. 1952 წელს სოფელ ჩონთოს მოსახლეობის მარნეულისა და ლაგოდეხის რაიონებში გადასახლების გამო გაუქმდა ამ სოფლის რვა წლიანი სკოლა და შეუერთდა გოგოლაძეების რვა წლიან სკოლას, იმავე წელს მოსახლეობამ თხოვნით მიმართა საჩხერის რაიონის უმაღლესი საბჭოს დეპუტატს აკადემიკოს სერგი დურმიშიძეს რვა წლიანი სკოლის საშუალო სკოლად გადაკეთების თაობაზე. ამ დროს სკოლაში სწავლობდა 500 მოსწავლე, სკოლის დირექტორი იყო ანდრო მაჭარაშვილი, 1975 წელს სკოლის დირექტორის ოთარი მაჭარაშვილისა და მისი ძმის, აკადემიკოს კარლო მაჭარაშვილის ძალისხმევით სოფელში აშენდა სკოლის თანამედროვე ტიპის, სამ სართულიანი, კაპიტალური შენობა, რომელიც აღჭურვილი იყო კლასკაბინეტური სისტემით, საგნობრივი ლაბორატორიებით, ღია ტიპის საცურაო აუზითა და იმ დროისათვის არსებული სტანდარტების მიხედვით მოწყობილი სპორტული ინფრასტრუქტურით. სკოლაში დანერგილი იყო პროფესიული სწავლება სასოფლო სამეურნეო ტექნიკისა, ფუნქციონირებდა მცირე მეურნეობა, მუშავდებოდა სასკოლო ნაკვეთები, რა დროსაც მოსწავლეები ეუფლებოდნენ შრომით, პრაქტიკულ უნარ ჩვევებს, სკოლაში არსებობდა შრომითი სწავლების კლას კაბინეტები, აღჭურვილი შრომის ხელსაწყო იარაღებითა და დაზგა დანადგარებით. სკოლა იმთავითვე წარმოადგენდა სოფლის ახალგაზრდობის სწავლა- განათლების ძირითად ცენტრს, სოფელი კორბოული ადმინისტრაციულ ტერიტორიული საზღვრებისა და მოსახლეობის რაოდენობის გათვალისწინებით დიდი სოფლების რიგში შედის არა მხოლოდ მუნიციპალიტეტისა და რეგიონის, არამედ მთელი საქართველოს სოფლებს შორის, აღსანიშნავია ის გარემოებაც რომ ზემო იმერთში პირველი სკოლა სწორედ კორბოულში დაფუძნდა 1878 წელს. ამ გარემოებამ და სხვა რიგმა ფაქტორებმა განაპირობა ის, რომ კორბოულში არსებული სამი საჯარო და ორი საბაზო სკოლიდან, მოსწავლეთა სწავლა სწავლების ერთ-ერთ ძირითად ცენტრად ყოველთვის ითვლებოდა და ითვლება N 2 საჯარო სკოლა. სკოლაში წლების განმავლობაში მოღვაწეობდნენ ახალგაზრდებზე და თავის საქმეზე უსაზღვროდ შეყვარებული პედაგოგები, რომლებიც დიდი მონდომებით, პედაგოგიური გამოცდილებითა და პროფესიონალიზმით შეიარაღებულები ემსახურებოდნენ ბავშვების სწავლის, აღზრდისა და განვითარების საქმეს. სკოლამ მრავალ ადამიანს მისცა ცოდნა, განათლება, განუვითარა უნარები, ჩამოუყალიბა დამოკიდებულება, მისცა განვითარების საშუალება. სკოლის მოსწავლეთა მიღწევები თვალსაჩინო და აღიარებულია რაიონის რეგიონის, ქვეყნის და საერთაშორისო მასშტაბით. მოსწავლეთა მიღწევები განსაკუთრებით თვალსაჩინოა ბოლო პერიოდში, ესაა ეროვნული სასწავლო საგნობრივი ოლიმპიადები, კონკურსები, სკოლის აღზრდილია ლაშა ტალახაძე.
No comments:
Post a Comment